შალი ტური გიწვევთ, შავი ზღვისპირა ქვეყანაში, რომელსაც ჩრდილოეთით ბუნებრივ საზღვარად 5000 მეტრზე მაღლა აზიდული, სამყაროს შუბლად წოდებული კავკასიონის ქედი აკრავს. “კავკასიის მთები ზაფხულის მზის ამოსვლის მიმართულებით მდებარე ყველა მთებს შორის ყველაზე შესანიშნავია თავისი სივრცითაც და სიმაღლითაც” - ჯერ კიდევ ძვ. წ.ა. IV ს-ში ამბობდა არისტოტელე... მრისხანე ზევსმა, ურჩი პრომეთე დანაშაულის გამოსასყიდად სწორედ აქ, ჩაყინულ კლდეზე მიაჯაჭვა...

საქარველო პირველი ევროპელების სამშობლოა. აქ ნაპოვნია ევროპაში ყველაზე ძველი 1 მლიონ 800 ათასი წლის წინ მობინადრე ადამიანების თავის ქალები, რომელთაც პირის აპარატის აგებულების მიხედვით მეტყველება შეეძლოთ. ოქროს საწმისის ქვეყანაში არა მხოლოდ ისტორიაა საოცარი, არამედ ბუნებაც სასწაულებით არის მდიდარი, აქ თვით ბუნებაა შემოქმედი... დიდი ქართველი მოაზროვნე და პოეტი ვაჟა-ფშაველა ამბობდა “სად შეგვიძლია ისე შევიყვაროთ ხელოვნება, როგორც თვით ბუნებას, რომელიც თავად ხელოვნებაა...”.

დიდი იბერიისა და კოლხეთის მხარე ვაზისა და ღვინის, ხორბლისა და რკინის, მრავალხმიანი სიმღერისა და ცეცხლოვანი ცეკვის სამშობლოა. მედიცინაც სწორედ კოლხეთის მეფე აიეტის ასულის, მედეას სახელს უკავშირდება, ის ხომ დიდოსტატი იყო წამლების, საწამლავების და ანტიდოტების დამზადების, მკურნალობის. 34 საუკუნის წინ არგონავტებმა კოლხეთიდან მოიპარეს “ოქროს საწმისი”, ტყავზე ოქროს ასოებით დაწერილი “დიდი სიბრძნე”, მოკლეს აიეტის მემკვიდრე აფსირტე და მედეაც მოიტაცეს.

კოლხეთი და იბერია ერთ სახელმწიფოდ ძვ. წ.ა.-ით IV-III საუკუნეში გაერთიანდა. აქ ოდითგან ცხოვრობდნენ ქართველური ტომები, მათ მსოფლიოში პირველებმა დაიწყეს რკინისა და ფოლადის დამუშავება და კაცობრიობის ისტორიაში ამ მხრივაც შეიტანეს თავისი წვლილი.

საქართველო, ეს იმ თვითმყოფადი ხალხის ქვეყანაა, რომელიც აღმოსავლეთიდან ევროპისაკენ კალიასავით

დაძრულ დამარბეველ ურდოებს საკუკუნეთა მანძილზე აკავებდა და ევროპას განვითარების საშუალებას აძლევდა.

საქართველოში ოდითგანვე მრავლად იყო განათლების კერა, თუმცა გეოგრაფიული მდებარეობის გამო ხშირ შემოსევებს უამრავი რამ ეწირებოდა. ქარველებს შემოჭრილი მტრების, მცირე თავდასხმების მოგერიების გარდა, წელიწადში რამდენიმე დიდი ბრძოლის გადატანაც უხდებოდათ. ხშირად, რამდენიმე მხრიდან ერთდროულად შემოსეულ მტერთან აწარმოებდნენ ბრძოლებს. საუკუნეების მანძილზე დამპყრობელთა ბარბაროსობის კვალი ჯერ კიდევ ბევრგან შეინიშნება.

- ამ მრავალრიცხოვან შემოსევებში ქართველებს ყოველთვის უთანასწორო ბრძოლები უწევდათ. იყო მარცხიც, იყო გამარჯვებაც. ქართველთა ბრწყინვალე საომარ ტაქტიკაზე ერთ-ერთი ტრიუმფალური გამარჯვებაც მეტყველებს, როდესაც 1121 წელს მაჰმადიანთა 400.000-იანი კოალიციური ლაშქარი ქართველთა 56 ათასიანმა ჯარმა დაამარცხა. ამ გამარჯვებით მართლმადიდებელი საქართველო ქრისტიანობის პლაცდარმად იქცა ევროპა-აზიის მიჯნაზე.

- ქვეყნის ისტორიას ყველაზე დიდი დაღი ერთმორწმუნე მეზობელთან ურთიერთობამ დაასვა, რომელმაც ჯერ 1801 წელს მისივე ღალატით დასუსტებული საქართველოს დაპყრობა შესძლო, დაიწყო მიზანმიმართული პოლიტიკური ნაღმების ჩადება, შემდეგ 1921 წელს, უკვე საბჭოთა რუსეთმა მოახდინა დამოუკიდებელი საქართველოს ანექსია. სწორედ მაშინ გასხვისდა საქართველოს ისტორიული ტერიტორიის ერთი მესამედი (18498 კვ.მ.) თავისი მოსახლეობით.
- მართლმადიდებლობა საქართველოს სახელმწიფო რელიგიად IV საუკუნეში გამოცხადდა.

- ამ ქვეყანაში შემოქმედების რენესანსი XI საუკუნეში დაიწყო.
- ქართველური ენები იბერიულ-კავკასიურ ენათა ჯგუფს მიეკუთვნება. მსოფლიოში არსებული 14 დამწერლობიდან ერთი ქართულია. ქართველებს უძველესი დამწერლობა აქვთ. ანბანში 33 ასო-ნიშანია. არ არის დიდი და პატარა ასოები, ყველა ასო თანაბარუფლებიანია. როგორც ისმის, ისე იწერება და როგორც იწერება, ისე იკითხება, ანუ რამდენიმე ასოთა კომბინაციით ახალი ბგერა არ იქმნება. მეტყველება მკაფიო ბგერებისაგან შედგება.

- საქართველოს თანამედროვე დედაქალაქი თბილისი V საუკუნეში გახდა სატახტო ქალაქი, როდესაც სამეფო რეზიდენცია ქალაქ მცხეთიდან აქ გადმოიტანეს. აღსანიშნავია, რომ მცხეთა ჯერ კიდევ 5.000 წლის წინ იყო დასახლებული, ხოლო აღმოსავლეთ საქართველოს ანუ იბერიის მთავარი ქალაქი 24 საუკუნის წინ გახდა.
- საქართველო ის ერთადერთი ქვეყანაა, სადაც ანექსიამდე ისტორიულად არასოდეს ყოფილა რელიგიური თუ ეთნიკური დაპირისპირება. აქ მკვიდრ ქართველებსა და სხვადასხვა ეთნიკურ ჯგუფებს შორის ურთიერთობა აკადემიური კულტურის ტოლფასი იყო.

- ქართველი შემოქმედები და მეცნიერები, მეომრები და სპორცმენები მსოფლიოში არიან აღიარებულნი.
- არ არსებობს მოგზაური, რომელიც საქართველოში იყო და არ შეჰყვარებია იგი. შთამბეჭდავია უძველესი არქიტექტურა, მონუმენტური ფერწერა, მრავალფეროვანი ზღაპრული ბუნება, სტუმარ-მასპინძლობა, დაუვიწყარი მოგონებები.
- საქართველო ის შთაგონების ქვეყანაა, სადაც მსოფლიოს მრავალი ქვეყნის შემოქმედი თავის დაკარგულ მუზას პოულობდა.

1898 წელი. ცნობილი ნორვეგიელი მწერალი და ნობელის პრემიის ლაურეატი კნუტ ჰამსუნი დანიელ კრიტიკოს გეორგ ბრანდესს წერს: “38 წლისა და უკვე ამდენი წიგნის ავტორი ვარ და ასე მგონია, არაფერი შემიქმნია, სასოწარკვეთილებაში ვარ, საკუთარი ნიჭის აღარ მჯერა”. 1899 წელს საქართველოში ინკოგნიტოდ ჩამოსულმა კნუტ ჰამსუნმა გაიფიქრა: “რატომ მაქვს ისეთი გრძნობა, თითქოს შინ დავბრუნდი?”. კავკასიაში მოგზაურობის შემდეგ მან დაწერა წიგნი “ზღაპრული ქვეყანა”, ...მტკვრის წყალი შევსვი და ეს იყო უდიდესი შეცდომა, რადგან ის ვინც ერთხელ მაინც დალევს მტკვრის წყალს, მთელი სიცოცხლის განმავლობაში საქართველოზე იდარდებს. ...მჯერა, რომ ამ მიდამოში ღმერთი ბინადრობს”. იგივე შემოქმედებითი კრიზისი ჰქონდა დიდ ალექსანდრე დიუმას, რომლისთვისაც კავკასია ახალი თავგადასავლების და მუშკეტერული ჟინის მშვენიერი არეალი იყო.

XII საუკუნის უდიდესი ქართველი პოეტის, შოთა რუსთაველის პოემა “ვეფხისტყაოსანი” მსოფლიო ლიტერატურის საგანძურშია შესული. იგი 44 ენაზეა ნათარგმნი. მხოლოდ საქართველოში 136 სხვადასხვა რედაქციით დაიბეჭდა.

ქართული მრავალხმიანი სიმღერებიდან ერთ-ერთი - “ჩაკრულო”, მსოფლიოს იმ 13 საოცრებათაგანია, რომელიც კოსმოსშია გაგზავნილი. ხოლო ცეცხლოვან ქართულ ცეკვას მსოფლიოს მეცხრე საოცრებად ნათლავენ.

საქართველოში არსებული ვაზის ჯიშებიდან 500 ადგილობრივია და უნიკალური. მსოფლიოში ღვინის დაყენების 2 ძირითადი მეთოდია - “კახური” და “ევროპული”. ცნობისათვის, კახეთი აღმოსავლეთ საქართველოს ერთ-ერთი რეგიონია. ღვინის ევროპული წესით დაყნება ისეთივეა, როგორიც ძველ კოლხეთში იყო, ამჟამადაც სწორედ ამ მეთოდს იყენებენ დასავლეთ საქართველოში.

ასევე უნიკალურია ქართული ხორბალი, რომელიც მსოფლიოს ტრიტიკოლოგებისათვის სასელექციო ბაზას წარმოადგენს. მსოფლიოში აღნუსხული ხორბლის ჯიშებიდან 15 ქართულია, აქედან 5 მხოლოდ საქართველოშია გავრცელებული.

ქართული ფუტკარი თუ ქართული ნაგაზი, თავიანთი ღირსებებით სპეციალისტებში დიდი პოპულარობით სარგებლობენ, ხოხბის სამშობლოც საქართველოა.

რაც შეეხება ქართულ სამზარეულოს, მასთან შეჭიდება თვით მსოფლიოში ცნობილ ინდოელ თუ ჩინელ მზარეულებსაც კი უჭირთ. გურმანებისათვის დაუვიწყარია ქართული სამზარეულო და შეუდარებელი ღვინო.

- საქართველო შედგება კუთხეებისაგან, როგორც სახლი ოთახებისაგან, ან როგორც ადამიანის სხეული მისი ორგანოებისაგან. საქართველოს კუთხეები თავიანთი მრავალფეროვნებით ერთ მთლიან ქვეყანას ქმნიან, რომელიც გულგრილს არავის ტოვებს.